اسلام آباد۔6ستمبر(اے پی پی) وزیراعظم محمد شہباز شریف مادر وطن دے پتراں تے افواج پاکستان دے عظیم سپوتاں کوں خراج تحسین پیش کریندے آکھیے ملک دی تاریخ اچ 6 ستمبر ٻہوں اہمیت رکھیندے ساݙی افواج دا حوصلہ اتے فرض نال لگن ہی پاکستان دی سلامتی دی بنیاد اے،’’عزم استحکام‘‘دے تحت نظر ثانی شدہ نیشنل ایکشن پلان دا مقصد ہر طرح دی دہشت گردی بشمول ڈیجیٹل دہشت گردی کوں ہمیشہ سانڳے منڈھوں مکاوݨاں اے ،حکومت تصادم دے بجائے مکالمے اتے ٹکرائو دی بجائے تعاون اتے شراکت داری تے یقین رکھیندی اے ،مسئلہ کشمیر دا حل نہ تھیوݨ خطے اچ قیام امن اتے ترقی دی رستے اچ ساریں توں وݙی رکاوٹ اے ، ہر پلیٹ فارم تے آپݨی آواز فلسطین سانڳے چیندے رہسوں ۔یوم دفاع و شہداء تے آپݨے سنھیے اچ وزیراعظم آکھیے پاکستان دی تاریخ اچ 6 ستمبر ٻہوں اہمیت رکھیندے۔ ہر سال ایں ݙینھ پاکستانی قوم یوم دفاع و شہداء وݙے ولولے اتے احترام نال منیندی اے ، اساں سارے مادر وطن دے پتراں تے افواج پاکستان دے عظیم سپوتاں کوں خراج تحسین پیش کریندوں جنھاں 6 ستمبر 1965 کوں ساݙی سر حداں تے حملہ آور دشمن دے خلاف لڑدے ہوئیں اینکوں ہرا ݙتا دشمن دے ایں غیر اعلانیہ حملے اتے عددی برتری دے باوجود افواج پاکستان دی بیداری اتے تیاری پاروں سارے محاذاں تے ہزیمت اتے عبرت ناک شکست دا سامݨا کرݨا پیا۔ گزریل 59 سال توں افواج پاکستان ہرویلھے تیار تے پیشہ ورانہ صلاحیتاں تے حربی تیاریاں دا مظاہر ہ کرتے جذبہ یوم دفاع کوں زندہ رکھیا ہویا اے جیڑھا ساݙے دفاع اتے استقلال دی علامت بݨ چکے، ایہا وجہ اے جو قوم ہر چیلنج اچ سرخرو تھئی اے بلا شبہ ساݙی افواج دا حوصلہ اتے فرض نال لگن ہی پاکستان دی سلامتی دی بنیاد اے۔ انھاں دیاں قربانیاں پاروں اساں ھک آزاد اتے خود مختار مملکت اچ زندگی گزریندے پیوں ۔ وزیراعظم آکھیے میں شہداء دے خانداناں کوں خراج عقیدت پیش کرینداں جنھاں دا جذبہ تے حوصلہ اساکوں محفوظ اتے تکڑے پاکستان دی تعمیر دا عزم بخشیندے ۔ جدید ترین حربی صلاحیتاں توں لیس ساݙی مسلح افواج اپݨی علاقائی سالمیت اتے خود مختار تشخص کوں نا قابل تسخیر بݨاوݨ سانڳے اپݨی استعداد اچ مسلسل ودھارا کریندی پئی اے ، ساݙی حکومت تصادم دے بجائے مکالمے اتے ٹکرائو دی بجائے تعاون اتے شراکت داری تے یقین رکھیندی اے ساݙا مقصد ایجھی ساز گار فضا بݨاو ماے جتھاں ساریاں قوماں ترقری کرن تے غربت، بیماری اتے جہالت جیھے مشترکہ مسئلے حل کرݨ تے توجہ ݙیون، انھاں آکھیے بد قسمتی نال مسئلہ کشمیر دا حل نہ تھیوݨ خطے اچ قیام امن اتے ترقی دی رستے اچ ساریں توں وݙی رکاوٹ اے ۔ مسئلہ کشمیر ونڈ برصغیر دا نامکمل ایجنڈا اے جیں کوں کشمیری عوام دی اُمنگاں تے اقوامِ متحدہ دی سلامتی کونسل دی قرارداں موجب استصواب رائے دے ذریعے وختی حل کرݨ دی لوڑھ اے ، ایندے نال ہمسائیں توں چوݨ آلی دہشتگردی دیاں پاڑاں کوں سانجھے تعاون تے مشترکہ مفاد دی حکمت عملی دے ذریعے منڈھوں مکاوݨ دی لوڑھ اے ۔ اڄ دے ݙینھ میں تساں سانڳے امید اتے عزم دا سنھیا ݙینداں ۔ یاد رکھو ساݙا ماضی بحیثیت قوم اوکھ تے قابو پاوݨ دی ساݙی صلاحیت دا گواہ اے۔ ہر واری اساں تکڑے تے عسکری اعتبار نال سخت جان تھی تے ابھریوں ۔وزیر اعظم آکھیے اڄ دے ݙینھ اساکوں ایں پکے عزم نال کم گھنݨا ہوسی جیڑھا ہمیشہ ساݙی سنڄاݨ رہیے ۔ ”عزم استحکام” دے تحت نظر ثانی شدہ نیشنل ایکشن پلان دا مقصد ساری قسم دی دہشت گردی بشمول ڈیجیٹل دہشت گردی کوں ہمیشہ سانڳے منڈھوں مکاوݨا اے ۔ لوڑھ ایں امر دی اے جو اساں سارے رل تے ھک خوشحال پاکستان دا رستہ بݨاؤں ۔ پاکستان فلسطینی عوام نال تکڑا تھی تے کھڑے ۔ اساں ہر پلیٹ فارم تے آپݨی آواز فلسطین سانڳے چیندے رہسوں فلسطینی عوام اسرائیلی قبضے دے خلاف اپݨی طویل جدوجہد اچ نا قابل یقین جرأت دا مظاہرہ کیتے۔ اساں عالمی برادری توں مطالبہ کریندوں جو او فلسطینی شہریاں دا تحفظ یقینی بݨاوے تے غزہ اچ بے گناہ مسلماناں دی نسل کشی بند کراوے۔ وزیر اعظم آکھیے میں شہداء اتے غازیاں دے خانداناں کوں وی سلام پیش کرینداں ۔ اللہ تعالی شہداء دے درجات اُچے کرے انھاں دے گھر آلیں کوں جرأت اتے ہمت عطا فرماوے۔ آؤ! شہداء دے جذبے کوں آپݨے دل اچ وسا تے پاکستان دا تحفظ اتے تعمیر کروں تے جذبہ دفاع پاکستان کوں جڳیندے عظمت دیاں بلندیاں چُھو گھنوں۔
