ڈیرہ اسماعیل خان۔4اگست (اے پی پی) وزیراعظم شہبازشریف آکھیا جو سیلاب اتے بارشاں نال متاثرہ آخری بندے دے آپݨے گھر آباد تھیوݨ تئیں چین نال کائنا بہسوں، 22 کروڑ عوام دی محنت تے تعاون نال پاکستان کوں قائد اعظم دا عظیم ملک ٻݨاوݨ اچ کوئی رکاوٹ کھڑی نی تھی سڳدی۔ وسائل نال مالا مال ملک دا معاشی طور تے آئی ایم ایف دا غلام تھیوݨ لمحہ فکریہ اے۔ اساکوں محنت اتے اتحاد نال نجات حاصل کرݨی اے۔ سیلاب متاثرین دی بحالی اچ ساریاں کوں حصہ پاوݨا پوسی۔ اے ڳالھیں وزیراعظم خمیس کوں ڈیرہ اسماعیل خان دی تحصیل دریاخان دی یونین کونسل بندکورائی اچ سیلاب متاثرہ علاقیاں دے دورے دے موقع تے آکھی۔ ایں موقع تے جمعیت علمائے اسلام (ف) دےسربراہ مولانا فضل الرحمان سیلاب توں متاثرہ علاقیاں دا دورہ کرݨ تے وزیراعظم دا شکریہ ادا کیتا۔ ایں موقع تے وزیراعظم کوں ݙسیا ڳیا جو پہاڑ پور دی 11 اچوں 5 یونین کونسلاں سیلاب توں متاثرتھی ڳئن۔ ایں موقع تے وزیراعظم متاثرین توں خطاب کریندیں ہوئیں آکھیا جو او تساں نال ہمدردی کرݨ کیتے حاضر تھین۔ طوفانی بارشاں اتے سیلاب ایں پورے علاقے اچ تباہی مچا ݙتی اے اللہ دا شکر اے کوئی جانی نقصان نی تھیا۔ وزیراعظم آکھیا جو وفاقی اتے صوبائی حکومتاں دا اے فرض اے جو او اوکھے ویلھے متاثرین نال مونݙھا رلا تے کھڑے تھیون۔ انہاں آکھیا جو سیلاب اتے بارشاں پاروں جاں بحق تھیوݨ آلیاں دے لواحقین کوں وفاقی حکومت ولوں ݙاہ لکھ روپے ݙیوݨ دا اعلان کیتا ڳئے ۔ وزیراعظم آکھیا جو وفاقی حکومت زخمیاں دی معاوضے دی رقم پنجوی ہزار توں ودھا تے اݙھائی لکھ روپے کر ݙتی اے۔ کچے پکے تباہ تھیوݨ آلے مکان دا معاوضہ ݙو لکھ توں ودھا تے پنڄ لکھ روپے کر ݙتا ڳئے۔
.jpg)
