اسلام آباد۔13جولائی(اے پی پی) وزیراعظم محمد شہباز شریف پاکستان اتے عالمی مالیاتی فنڈ وچال سٹاف لیول معاہدے تے اطمینان کریندے آکھیے نواں قرض پروگرام پاکستان اچ معاشی استحکام گھن آسی ،قرضے توں نجات اتے معاشی خوشحالی دا دور وختی آسی، پاکستان کوں اوکھی معاشی صورتحال توں کڈھݨ اچ آئی ایم ایف معاہدہ اہم ثابت تھئے ۔وزیر اعظم آفس دے میڈیا ونگ توں جاری بیان موجب آئی ایم ایف پاکستان نال 37 مہینے دے قرض پروگرام تے آمادگی ظاہر کیتی اے جیں دے تحت پاکستان کوں 7 ارب امریکی ڈالرز ملسن ۔وزیر اعظم آکھیے پاکستان دے معاشی تحفظ سانڳے تلخ تے اوکھے فیصلے کیتن ۔ اوکھے فیصلیں دے ثمرات معاشی استحکام دی صورت اچ سامݨے آندے پئن ۔ پاکستان کوں اوکھی معاشی صورتحال توں کڈھݨ اچ آئی ایم ایف معاہدہ اہم ثابت تھئے۔وزیراعظم آکھیے اوکھے ویلھے ساتھ ݙیوݨ تے آئی ایم ایف دے مشکور ہیسے،حکومت معیشت کوں چنڳاں کرݨ سانڳے پہلی بنیاداں تے کم جاری رکھیا ہویا اے ،آئی ایم ایف پروگرام توں پاکستان اچ مالیاتی تے مانیٹری پالیسی کوں تکڑا بݨاوݨ دے اقدامات دے نال نال ٹیکس بیس کوں ودھایا ویسی،گزریل ھک سال اچ پاکستان اچ زرمبادلہ دے ذخیرے چنڳے تھیندے پئن تے معاشی استحکام ودھ ڳئے ۔وزیر اعظم آکھیے وفاقی وزیر خزانہ و محصولات محمد اورنگزیب سودھے ساری معاشی ٹیم تےصوبائی وزراء اعلیٰ دیاں کوششاں دی تعریف کریندوں نواں قضے دا پروگرام پاکستان اچ معاشی استحکام گھن آسی،انشاءاللہ قرے توں جند چھڑیسوں تے معاشی خوشحالی دا دور آسی ۔وزیراعظم آکھیے پاکستان کوں استحکام نال تکڑے تے پائیدار بحالی آلے پاسے گھن ونڄݨ ساݙا عزم اےکامیابی اوں ݙینھ ہوسی جݙاں قرضے توں جند چھڑویسوں ،حکومت معاشی اصلاحات دے ایجنڈے کوں تکھے اڳوں ودھیندی پئی اے ۔وزیراعظم آکھیے انہاں اقدامات پاروں ملک دی اقتصادی بنیاداں کوں تکڑا کرݨ تے شہریاں سانڳے پائیدار ترقی تے خوشحالی دے رستے متعین کرݨ اچ مدد ملسی ،حکومت پالیسی ریفارمز اتے مالیاتی اہداف تے سختی نال کاربند تھی تے ملک دے گھٹ آمدݨ آلے طبقے دا سہارا بݨی۔وزیراعظم آکھیے اساں معیشت اچ بہتری سانڳے ایکسچینج ریٹ کوں مستحکم کیتے، پائیدار شرح نمو گھنݨ سانڳے اقدامات چاتے ،پاکستان کوں استحکام دے مرحلے نال اڳوں ودھ تے طاقتور معیشت دے پاسے ونڄݨا ہوسی ،انشاءاللہ ساݙے اقدامات نال معاشی ترقی دا سفر مکمل تھیسی
.jpg)
